求驗客手記:首名出線巴利「威」過英軍

求驗客手記:
首名出線巴利「威」過英軍

呢邊廂,英格蘭喺聖伊天只能夠同斯洛伐克打和0:0,但喺嗰邊廂,同組嘅威爾斯就喺圖盧茲送咗俄羅斯三蛋,仲以六分喺B組首名出線,58年嚟首次踢大賽就有咁嘅成績,認真威威。
威爾斯鬥俄羅斯可以話係今屆賽事其中一場筍盤,因為從分組賽頭兩場所見,威爾斯表現點都好過俄羅斯,但係竟然臨場仲有威爾斯受讓平/半買,搞到我求大俠都忍唔住買咗少少威爾斯下盤。而接戰之下,威爾斯的確冇令我失望,喺開波11分鐘就由中場艾朗藍斯先開紀錄;20分鐘,後衞尼爾泰萊助攻得手,領先到2:0。喺之前兩場分組賽都憑主射自由球破網嘅加里夫巴利,喺67分鐘亦建一功,但今次係接應藍斯妙傳射入。威爾斯順利出線,而巴利仲係近三屆歐國盃決賽周首位連續三場分組賽都有入球嘅球員。
賽後威爾斯領隊高文話:「我唔介意人哋話我哋係一人球隊,因為巴利實在係勁;不過,晉身16強,亦係全隊嘅功勞,我覺得好驕傲。」至於僅得一分而出局嘅俄羅斯,佢哋嘅教練史路斯基亦黯然下台。