如果話香港嘅「金句王」係黎明，咁代表中國嘅「金句王」，阿里巴巴主席馬雲認第二，冇幾個敢認第一。
早前馬雲話淘寶「很多假貨及服務比真貨還要好，價格也更低」，結果惹來LV、Gucci母公司開雲集團同愛馬仕發聯合聲明譴責，指言論誤導消費者。不過，馬雲又點會咁快收口吖。
日前喺俄羅斯聖彼德堡國際經濟論壇上，佢再次語出驚人，直言「我有生以來最大的錯誤就是創建阿里巴巴」，因為公司用咗佢好多時間，佢話自己當時只係想成立一間小公司，仲講到如果有來生，「不會再做這樣的生意」，「希望有機會去到世界上任何一個國家，在那裏平靜度日。我不想談論商業，不想工作」。
一個前中國首富，同你講最大嘅錯誤係開咗間令佢發達嘅公司，你可以同佢講：「咁辛苦，不如你畀晒間公司我喇。」睇佢會有乜反應。
其實，覺得自己犯錯，例如睇錯市，最好嘅方法就係沽貨離場。如果馬雲話成立阿里巴巴係佢有生以來嘅最大錯誤，咁就應該坐言起身，賣晒持有嘅阿里股票，然後退休，唔使等來世，已經可以唔講商業工作。