立法會選舉9月先舉行，但民主黨許智峯同香港眾志羅冠聰噚日就先上戰場，上陣參加健康空氣行動同德輔道中聯盟合辦嘅「德輔道中扮工椅格蘭披治障礙賽」，活動係希望中環人反思吓點解中環空氣質素咁差。
兩位大男孩大扮Mario同Luigi，坐住辦公椅喺德輔道中碌嚟碌去，嗰陣咁啱係放飯時間，人多車多，阻住條街又碌親人隻腳，當然唔少得俾人問候兩句啦！
攞到冠軍嘅許智峯話，條街比想像中熱同窄，空氣又差，如果可以多番幾棵樹會涼爽好多。佢話中西區區議會好耐之前爭取緊將德輔道中變成行人專用區同做綠化，但政府就一直唔肯正面回應，驚會搞到中環其他地方塞車喎。佢仲話，政府冇乜決心搞好空氣又驚改變，所以𠵱家只可以喺路邊種下盆栽。