英國留歐定脫歐，當地時間周四嘅公投後有分曉，喺英國浸過鹹水嘅民建聯副主席周浩鼎似乎好關心呢個議題，八方聽聞佢去年12月到英國旅行時，主動求見國會議員交換意見。
阿鼎向八方證實，去年底確實見過保守黨國會議員Mark Garnier（圖），席間主要談及如何推動small business，為香港取經，但都問及對方點睇留定脫歐呢個火辣議題，引述對方支持留歐，覺得英國係其他歐洲國家進入中國嘅踏板，留比走有利。阿鼎話認同，仲引伸講到香港都唔應該脫離中國獨立，否則點可能有前途。咦，泛民同外國官員、議員見面，不時被愛國陣營批評勾結外國勢力，阿鼎呢次主動勾結，唔怕俾同陣營指指點點？佢強調純粹以個人身份見面交流意見，事先都冇向黨內申報呢次密會。