地產建設商會噚晚舉行50周年酒會，各大發展商嘅「大冧巴」盡出之外，亦見到唔少佢哋嘅二、三代出現，好似信置（083）三位太子爺（左起）黃永耀、黃永光、黃永龍就跟埋爸爸黃志祥一齊到，不過佢哋三兄弟大個仔，撇開爸爸，自己同其他賓客吹水。
恒隆地產（101）太子爺陳文博就同董事總經理陳南祿一齊，恒地（012）二少李家誠好乖喎，陪實爸爸「四叔」李兆基。最巴弊應該係代表新地（016）企上台嘅郭氏家族第三代郭基煇，呢晚唔見佢阿叔郭炳聯，新地靠佢做代表。
呢個場合已經逐漸睇到新舊交替嘅開始，不過呢班富二、三代要真正話事擔大旗，可能仲要等多幾十年。
