啪啪啪啪！撞擊聲此起彼落，中間仲夾雜住兩個人嘅叫喊聲，唔通係……
嗱，你咪心邪啊，呢啲聲係嚟自日本奈良菓子店中谷堂，嗰度每日都會不定時上演麻糬騷，兩位職人會一人揸槌喪揼、一人用手翻動米糰，你進我退、你來我往，睇到人眼都花。
點解要咁做？因為麻糬（即日式糯米糍）嘅主要材料係糯米，蒸熟之後要反覆搓打，整出嚟先會Q、彈、軟、糯。中谷堂嘅巴弊之處就係，負責用手打嘅嗰位職人，亦即係老闆中谷充男先生，曾經上過日本電視節目《SASUKE》露兩手，仲被譽為最快手嘅麻糬職人。有幾快？佢本人就話每秒三下！咪同我講其實唔難吖！
不過打邊爐最緊要個爐，麻糬都要好食先得。呢度嘅麻糬加咗艾草，食落有啖啖香氣，中間包住大大粒嘅十勝紅豆，外面就撲上日本黃豆粉，一盒5粒賣650日圓，真係睇後又食得！下次去奈良，除咗餵鹿仔、行神社、食布丁，記得去碰吓運氣，欣賞一場真人快打騷啦！
資料來源：ANA、EATER
記者：陳國棟
