「雪姑七友七個小矮人……」八方忽然咁好唱口，因為睇到王維基幼稚園開聖誕聯歡會時，扮過cute爆小矮人，可惜白雪公主冇同場。
自創咖啡粉溝雞精提神
55歲嘅王維基喺九龍城民生書院讀幼稚園，當時一家四口住喺何文田同紅磡交界，因為六七暴動，九龍城好多土製菠蘿，阿媽唔放心，升小學時轉去培正，至小六先返民生書院，中學亦喺民生書院度過。佢話中學時打手板罰留堂係閒事，多嘴更係必然，中二試過當住成班同學問阿Sir咪追Miss Wong（即係佢班主任），搞到阿Sir「面都紅晒」。
中學搞學生會，坦言讀書成績麻麻，卻以百日極速死讀絕技，配以自創咖啡粉溝雞精嘅獨門提神秘方，每日讀到凌晨5、6點先瞓，中午起身又狂溫，會考竟獲1A2B3C，喺民生繼續升學，高考1A2B2C都入唔到首志願嘅中大工商管理，卻入咗排第三嘅中大電子工程，由唔識到出色，真係要自強不息。
八方問佢：「讀書成績係咪中游？」佢好肉緊咁搶答：「冇呀，我中學冇拍過拖㗎！」乜成績同拍拖有關？請教之際卻發現：「我聽到你問我係咪『風流』吖嘛……」點解中學唔發市？「嘩，我又細粒又醜樣，唔鍾意音樂又唔運動，大悶蛋嚟㗎喎」，然後反覆重申自己真係悶蛋喎！