啱啱呢個禮拜日真係一剔牌嘅大日子，喺美國有佢哋贊助嘅勒邦占士幫騎士奇蹟反勝勇士拎NBA總冠軍，喺歐國盃就要多謝同行襯托，無啦啦上位！喺A組尾輪分組賽，法國同瑞士踢成○比○，雙方攜手晉級；但最多人講嘅係瑞士件豹牌波衫一場爛五件，三間牌個波又俾對一剔波砵踩爆！邊個係最大贏家？唔使開名啦！
今屆歐國盃踢到第三輪分組賽，好多場外嘢都做得唔好，例如足球流氓問題、球場保安唔夠嚴謹，仲有啲執波仔好似冇受過訓練之類。嚟到星期日法國對瑞士又多兩個問題，就係波衫同個波質量麻麻嘞。根據我求大俠所見，瑞士嗰晚場波至少爛咗五件波衫，不幸爛衫嘅有前鋒美密迪、比列安保路、中場迪斯馬利同格列沙加。
四瑞士兵爛五件衫
明明得四個人，點爛五件衫呀？是咁的，沙加黑仔到一場爛兩件衫，其中俾法國中場保羅普巴拉衫嗰次爛得最誇張，左邊腰位穿咗個窿，嚇到普巴拉完衫都呆一呆。唔少網民都話豹牌要檢討吓，做乜啲衫咁易爛，亦有人話呢招係「黑暗兵法」，特登整到件衫易爛啲，一拉就爛晒，咁球證咪好難睇唔到囉！犧牲件衫就易啲博犯規，如果呢種黑暗兵法普及，相信有助中國球衣出口。
除咗瑞士波衫，今場嘅比賽用波、三間嘅Beau Jeu亦係主角。下半場瑞士嘅比哈美同法國嘅基沙文爭波，睇落比哈美唔小心用鞋釘踩爆咗個波，嚇到佢呆一呆，應該唔使賠錢啩！啲衫咁易爛、啲波咁易爆，真係踢街場都冇咁「化學」喎！豹牌同三間都喺呢場波瀨晒嘢，佢哋嘅最大競爭對手一剔自然最開心，旗下法國波衫唔單止冇穿冇爛，原來比哈美踩爆波嗰對波砵都係一剔嘅，喺質量方面，三個品牌高下立見喎；瑞士中場梳頓沙基利賽後都忍唔住話：「我希望豹牌唔好出安全套！」
互交白卷攜手出線
好，講返呢場波嘅配角，主隊嘅普巴同皮耶先後射中楣，搞到法國攻唔入，同瑞士踢成○比○；但其實兩隊各取所需，法國最後得七分首名晉級，瑞士就有五分拎到次名。至於阿爾巴尼亞同日贏咗羅馬尼亞一比○排第三，未知出唔出到線住。
