滙豐銀行委託市場調查公司，於二月至三月訪問十五個國家及地區共逾六千名家長，包括四百名香港人，得出一個調查結果，講香港家長開支（支持子女讀大學），每年平均十二萬五千四百多元，於十五個國家地區排名第二，僅次於阿聯酋（十四萬二千二百九十元），新加坡排第三，美國排第四。
呢個調查信唔信得過？千祈唔好信到十足，以常識嚟講，在香港讀書學費好平，每年四萬二千五百元學費，相等於唔夠五千五百美元，去美國讀州立大學都唔得啦，讀史丹福哈佛，閒閒地要四五萬美元，有多無少。在香港讀大學，計埋宿費及其他開支嘞，上述調查之數字係125,411元，都係大約一萬六千美元啫，平過美國好多，調查又指美國家長每年開支113,755港元，約莫一萬四千五百美元，其實相當偏低。結論係滙豐之調查報告得啖笑，不可信以為真。
以今日流行用語講，左丁山曾是留學一帶一路嘅學生，認真嚟講，未必算係第一批，因為有一位新亞化學系師兄丘集海（1969年畢業）在左丁山之前一年到曼谷之亞洲理工學院（Asia Institute of Technology）讀碩士，專攻污水處理，當年大家還不知甚麼是污水處理，丘集海回港後搵唔到工，走返泰國入咗可口可樂工廠，處理污水；後來香港在沙田設立污水處理廠，我地通知佢去應徵，因學歷啱晒，即獲聘任，後來好似仲做埋廠長。左丁山到曼谷時，法政大學集中在市區上課（他拍贊校園），在皇家田對面，近遊客必到之地，Grand Palace。校園擠塞，校外街道噪音如雷，人車爭路，至今還是如此，可說四十年不變。不過嗰陣時香港還未發達，左丁山係窮光蛋一名，攞到獎學金已經開心到震，當時在香港嘅居住環境唔好得曼谷幾多，故此好鍾意嗰種自由自在生活，但未去之前，成日俾人問：「點解去曼谷，美國大學唔收你呀？」自己嘅標準答案係：「為咗免費讀書啫，無錢去美國呀。」到了21世紀今天，香港家長送子女到英美加澳，全不缺錢，肯唔肯俾子女去曼谷讀碩士，疑問大矣哉，去印尼、印度孟加拉更加不足論。撫心自問，自己在曼谷讀書，得益良多，回味無窮，同埋一齊去嘅有一位後來成為立法局議員，就係羅祥國（前全國政協委員），吳克儉局長不妨請呢位中大師兄向學生講解吓留學一路之泰國，幫手推銷吓一帶一路獎學金吖。