一年一度嘅公共醫療醫生協會晚宴，今年請咗紅爆網絡嘅自由黨立法會議員田北俊做嘉賓。民建聯接連被踢爆濫用特權去公院睇醫生，田少就不避嫌自爆，自己過去十幾年有病，都係去瑪麗醫院睇醫生㗎喎，佢坦言有錢其實係可以去養和，但係都揀咗瑪麗，因為對公院醫生有信心。田少抽水話喺𠵱家特區政府管治咁亂之下，相對起嚟，醫管局嘅管治已經好好咯。醫管局管治好唔好，見仁見智啦，但醫管局主席梁智仁噚晚就叫醫生，如果有醫療事故，應先向上層通報，唔好報畀傳媒喎。