梁振英噚日傍晚出席地產建設商會50周年酒會，佢致辭時提到，佢屋企第一次買樓，係用咗2.38萬元「上車」。嘩，呢個係乜嘢概念，2.38萬元家陣只能夠買到一平方呎。
睇番資料，本報2014年曾報道，梁振英屋企上世紀六十年代靠穿膠花儲錢買樓，皆因六七暴動，本港經濟疲弱，樓市下滑。
以1969年西環利華大廈一個建築面積約380呎嘅單位為例，新樓僅2萬多元起，而當時一名廠務練習生月薪有300元，即約6年薪金就可買一個單位，如果佢一家喺六七暴動前儲夠錢，就可以兩萬幾上車嘞。
除咗講番自己屋企用幾銀上車，梁振英噚晚亦讚揚地產建設商會為香港創造愉快環境，「興建好多郊野公園與特色景點」喎。不過，特首唔知記唔記得，佢為解決香港市民嘅住屋問題，正對郊野公園打主意呢？