新股想攞好意頭各出奇招，捐錢畀公益金自選冧巴就最直接。聽日開始招股嘅東方證券（3958），可能管理層全部係內地人講普通話，唔知道佢哋呢個股票冧巴，用廣東話讀，聽起上嚟有啲尷尬喎。
頭兩個數字3、9，生意長久，長做長有當然好。但係後尾兩個數字5、8，廣東話講起嚟係「唔發」喎，公司無理由倒自己米，叫股民買呢隻唔會發達嘅股票㗎。
唯一解釋，係東方證券高層書卷味濃，鍾意讀古文，讀做「吾發」呢？做得券商就當然發，但公司自己（吾）發晒又唔得喎，公司上得市，當然要同小股民齊齊發，皆大歡喜，董事長潘鑫軍要諗諗喇。