署理特首曾俊華噚日都幾忙，朝早出席完無家者世界盃活動，晏晝又去香港社會創投基金喺深水埗醫局街嘅基地啟用儀式，參觀其中一個項目「遊樂道．夢想天地」嘅工作室。
鬍鬚曾心情大靚，全程笑笑口，行到介紹Ukulele攤位時，好似細路仔咁，即場問旁邊小朋友可唔可以嚟試玩？小弟弟諗咗陣，先至遞支Ukulele畀薯片叔叔，但薯片叔叔拎上手先發現結他太細，笑住話自己彈唔到，有職員畀支大少少嘅Ukulele佢，但鬍鬚曾其實唔識彈，一度嘗試哄個頭埋去聽吓彈到乜嘢音，好鬼搞笑！
而喺開幕禮上，鬍鬚曾等出場時，獲全場觀眾起哄歡迎。儀式臨完主持更加笑住叫鬍鬚曾辭職，相信係叫佢辭職去選特首啩！