金融L在世界貿易會（World Trade Centre Club）請吃午飯，此處臨海一邊，有無敵維港景，望出去十分怡神養目，問金融L是否鍾意此處風景好，食飯開胃？金融L話：「非也，我今日戴住一頂NGO主席嘅帽請你食飯，有預算限制，喺呢度請你，肯定唔會超出預算。」原來如此，NGO與外國駐港機構以至特區政府高官，請客食飯都有規定標準，譬如每個人頭不得超過200-500元，普遍係300元左右，有此限制，大酒店、鏞記就幾乎一定唔去得，金融L識揀世貿會，算佢一片苦心。記得有一次左丁山請三位靚女在上海總會食飯，剛巧佢地又與金融L相識，金融L就啱啱坐在隔籬枱，埋單時先知道金融L先行結帳，簽埋左丁山張枱，用佢私人錢，唔關NGO事，就可以咁疏爽囉。
我地幾人講完地產、金融、英國脫歐，就講到大熱門題目，一帶一路及猜誰是下任特首。金融L話一帶一路係大題目，剩係講十億元獎學金，已經有排拗，特區政府難以服眾，左丁山特登問：「有冇優秀香港學生肯去烏茲別克？」金融L大笑：「我對大學略有認識，夠膽講一句：肯去一帶嘅學生會係稀有品種，叻仔叻女想去吉爾吉斯，父母都會拼命阻止呀，我知道不少大學生連大陸都唔肯去，你叫佢地去中亞細亞？」我地特區政府係咁堅離地㗎嘞，不過原則上左丁山係唔反對有獎學金俾學生去一帶一路留學嘅，既然有錢響度，咪睇吓市場反應點，考DSE得7科5**嘅學生，一定會申請獎學金去牛劍哈耶史丹福，考7科3嘅，咪試吓申請去詩仙李白嘅鄉下囉！
大家又講起誰是下屆特首，呢個是猜謎遊戲，才子曾鈺成在am730專欄（6月13日）出謎面，「寬掌彩綢，無財暗占」，俾晒貼士，引用楊修「絕妙好辭」的故事，講明曹娥格，於是變得好易估，左丁山家族WhatsApp群組議論後，唔夠十分鐘，左丁山老襟已傳來答案：「拒絕欽點」，有成員不明所以，左丁山就加插註解：「寬掌，巨手也，手巨即是拒！彩綢，色絲也，即絕；無財，五行欠水，水即金，欠金便是欽，暗占，暗地裏占卜，黑箱裏求占卦，就是點，四字加埋就是拒絕欽點。」WhatsApp未寫完，馬場才子余伯樂已傳來謎底：拒絕欽點。曾鈺成真係夠卜，身為建制派元老，竟敢公開聲明拒絕欽點特首，係唔係已有內幕堅料呀，否則佢要付出政治代價嘅噃！