買樓唔只係香港仔嘅夢，喺英國嘅八、九十後同樣都好買樓，一樣唔鍾意租樓。有頭髮邊個，邊個想做癩痢？巴打話英文係咁講：「If I had a choice!」
論上樓難度，英國冇殼蝸牛同樣艱難。英國首次置業買家，平均樓價對收入比例，係5.1倍。倫敦市中心樓價仲誇張，平均樓價對收入比例有9.2倍。距離倫敦市中心越遠，市郊地區就樓價自然平，樓價對收入比例約3.4倍。英國倫敦樓價平均為47萬英鎊，但人哋係買house嘅，基本上冇500幾萬港紙都唔使諗。
當然，首次置業毋須刻意制定太高目標。倫敦市中心買唔到，其他城市話唔定有筍盤。聽講曼徹斯特係一個理想之選，上網睇下地產網嘅資料，原來曼徹斯特「供仲抵過租」！一間兩房嘅house計，月租762鎊，家陣英鎊兌港紙「11.2算」，即係8,500幾蚊港元。不過，如果借盡25年供樓，每月還款676鎊，折合約7,500幾蚊，平過租屋成千蚊。所以，筍嘢唔係周圍有，但最緊要識揀。
呢個星期四英國舉行脫歐公投，英國投票都要識得揀。無論喺支持「脫歐」或者「留歐」嘅英國人都希望有出路。至於最現實、衰啲講鍾意睇人仆值嘅港人，或者諗過英國脫離歐盟，英鎊大跌，咪可以買樓同大手掃英國貨囉。但慳啲啦baby！大家都喺變數重重嘅時候觀望，仲要留意，英國近幾屆大選後，樓市冇乜影響，成交仲調頭上升。假如英國留在歐盟，咁人哋個住屋需求又會突然消失，所以唔使對英國樓市大冧有太多幻想。
Captain Cool
https://www.facebook.com/seeforcaptain/
本欄逢周一刊出