愛爾蘭副領隊堅尼之前狂插比利時中場夏薩特冇職業道德，結果佢隊波上周六喺歐國盃E組俾比利時數咗三粒；周三佢哋會對以首名入咗16強嘅意大利。今次堅尼就冇鬧意大利，仲大讚對方將防守足球發揮得淋漓盡致：「我認為喺幾個星期之後，我哋已經返咗屋企，但意大利會入咗決賽。我向來係意大利嘅粉絲，佢哋好享受踢防守足球，我亦好享受睇佢哋比賽，要我畀錢買飛入場睇都肯㗎。」堅尼向意大利大送高帽，唔知係咪想對方喺周三放佢哋一條生路呢？