特朗普不但冇朋友，仲要累街坊！據美國政治新聞網站Politico引述消息透露，蘋果公司向共和黨私下表示，蘋果今年唔會好似以前咁，贊助共和黨全國代表大會，因蘋果唔認同該黨篤定總統候選人特朗普喺少數民族、女性同移民問題上嘅觀點。
雖然谷歌（Google）、微軟及facebook都憂慮特朗普當選，但佢哋今年照舊贊助共和黨大會，以往蘋果一般同時贊助民主共和兩黨大會。
其實，蘋果唔like特朗普已經唔係呢兩日嘅事。據講，今年3月蘋果行政總裁庫克與其他矽谷大佬、金融巨頭同政治人物，組織一場阻止特朗普當選總統嘅會議。
鬼咩，今年1月，特朗普對選民承諾，要令蘋果喺美國製造iPhone。一個月之後，佢又因加州聖貝納迪諾槍擊案，鼓吹民眾抵制蘋果產品，蘋果好難支持佢啫。