又係嗰句，雷神即係雷神，呢位巴西勁人停賽期滿這天復出，成績非常驕人。
第八場1400米三級賽精英盃，雷神夥拍蔡約翰馬房鎮倉寶、綽號太陽神的「首飾太陽」出場，1檔起步沿途守內欄好位一步冇蝕，直路移出外叠望空衝刺時，雖一度俾「飛來猛」挨出，走歪咗跑線蝕咗啲位，但休後3個月復出的「首飾太陽」最終以勁勢壓住「飛來猛」先過終點，單Win及組合獨贏3揀1開出A1，分別派16及12元正，組合獨贏勝出練馬師開B2蔡約翰，派16元正。蔡約翰太太及女兒，亦有拉頭馬慶祝父親節。
「首飾太陽」在港9戰得7冠1亞，今季已勝經典一哩賽、香港經典盃及精英盃三項分級賽。而雷神這天截至此場贏了「港林飛魚」、精英碟「喜蓮獎星」、精英盃「首飾太陽」三Win，包辦全日兩項分級賽。
上屆精英盃名由摩廐「風花雪月」力壓蔡廐「驌龍」勝出，今屆阿蔡以「首飾太陽」擊敗大摩的「飛來猛」，成功報卻一箭之仇，「飛來猛」只得第二。今場三、四名都係冷門，分別為綠燈馬「駿馬名駒」及鞋王李子彬家族的「誰可拼」，四重彩派3,757元。