【本報訊】35歲的江恩明，是香港罕有的全職湊仔公。「回歸家庭嘅爸爸，數量急升，但比例仍然係蚊型！」如果人生注定要分飾不同角色，這個既是兒子，也是兩子之父的陽光中佬，一年多前，決心重新演繹兩個人生重要角色，除了組成另類「爸爸團」，帶仔女露營游夜水；又孖着八旬老父，「兩支公」歐遊，暫離讓他贏得安全感及舒適生活的穩定工作，奢侈地以積蓄換取時間，活在當下。
3年前，江恩明仍是泰國旅遊局市場部經理，一年之中一半時間不在港；3年後的今日，他成了老父的御用導遊、一對寶貝仔的玩伴和家庭教師。「端午節前一晚，我哋先搞咗個爸爸團，7個爸爸帶住7個細路游夜水，原意係覺得冇阿媽在場，會好玩啲，因為阿媽會覺得呢樣污糟嗰樣危險，我嘅原則係冇生命危險、唔會造成永久傷殘嘅前提下，細路仔乜都可以試吓」。這個儼如孩子王的俏皮爸爸大笑。
上一代嘅爸爸，長時間工作，同仔女相處時間少，關係自然冇咁親密
名為「爸爸假到」的另類親子團，讓他反思爸爸這個角色。他笑言一個「假」字除了玩食字，還有兩重意思。「一是讓媽咪放吓假；二是希望爸爸都可以享受同仔女共處，好似放假咁開心」。雙職父母很普遍，但湊仔的責任，還是多落在媽媽身上。「上一代嘅爸爸，長時間工作，同仔女相處時間少，關係自然冇咁親密」。他有五兄弟姐妹，家有嚴父，曾幾何時，他與父親關係一樣疏離。
「細個老竇賣菜，朝早4點幾就出門口，到夜晚9點先返屋企食飯」。上一代爸爸，為口奔馳，賺錢養家，愛嘛，怎會掛在嘴邊。江恩明直言，老父是傳統潮州人，沉默嚴肅，對爸爸的童年回憶，離不開「等佢食晚飯」和打罵，有心事也只會和媽媽傾訴。「細個好反叛，成日覺得，若有屋企人過身，我都未必會流眼淚；又好希望離開屋企，去第二度生活」。畢業後3年，儲了小筆錢，他申請到澳洲工作假期。
感受好深，覺得從冇點孝順過佢，好想帶佢出去，睇吓呢個世界
「嗰時諗住留澳洲一年，之後諗辦法留多一年，就過新西蘭」。幻想中的自由獨立生活成真，萬沒想到的是，平素嚴肅又寡言的江爸爸，親身到機場送行，哭成淚人。「從冇諗過會咁，連我自己都喺度喊到停唔到」。壓抑多年的感情，就如江河決堤，赫然發現，父親的愛，無比重要。結束工作假期，出走了又回來，這個家，變得有點不一樣。「人大咗，心態唔同，嗰時老竇差唔多退休，身體開始轉差」。中風、黃斑點病變惡化，一隻眼只剩5%視力，還有一身老人病。
加上已為人父，他開始反思爸爸這個角色。「感受好深，覺得從冇點孝順過佢，好想帶佢出去，睇吓呢個世界」。2013年，工作剛好約滿，這個旅遊專家，索性放自己一個悠長假期，不過今次就非自己去旅行，而是充當爸爸的的私人導遊。「嗰一年，去咗好多地方，青島、西安、泰國，仲坐埋郵輪去歐洲」。奢侈地以積蓄換取時間，還得多謝志同道合的太太無限量支持，互相補位。而這個父親節，他亦選擇做回兒子角色，一家四口返回老家慶祝，讓老父再做主角！
■記者呂麗嬋