返嚟喇！香港「跳遠王子」陳銘泰，去咗歐洲比賽兩星期，上周六喺比利時嘅國際田徑賽，以7.78米攞咗個冠軍後，今日啟程回港，準備出戰今個星期六喺將軍澳運動場舉行嘅城市田徑錦標賽，佢話想挑戰8.15米嘅里約奧運參賽標準。
呢位20歲港大生，上月喺香港田徑賽「爆seed」，跳出8.12米嘅新港績（下圖），成為首位港人跳過八米後，近兩星期去咗歐洲比賽，今個月11號喺日內瓦以7.92米奪冠；七日後，即係上周六，再喺比利時出戰國際田徑賽跳遠項目，喺包括墨西哥同歐洲等共六位選手參加下奪金。
歐洲賽連贏兩金
陳銘泰賽後話：「跳得算可以，狀態提升緊，有信心喺城市邀請賽造到八米以上、甚至奧運參賽標準嘅成績，關鍵係要表現穩定。」比利時今站亞軍為墨西哥選手Morales，佢只跳出7.35米。