2016街頭健身世界盃香港站，噚日喺荷里活廣場舉行，23位參賽者經過三輪賽事，結果挪威長髮型男宋德樂，壓倒香港吳宇軒同莫皓然，成為世界盃香港站冠軍，12月將會同亞軍吳宇軒，去北京參加世界盃超級決賽。雖然街頭健身喺香港算係幾冷門，但噚日都吸引唔少市民圍觀，參賽者做出高難度動作時，睇到圍觀者個個嘩嘩聲；同場舉行嘅香港錦標賽，之前教方詠琳（琳琳BB）玩街頭健身嘅黃煒峰就順利贏冠軍。