中國女排（圖）噚日喺世界女排大獎賽澳門站，以3:0大勝宿敵巴西，三戰全勝奪冠，連續兩站全勝，認真威水，大軍噚晚已經過咗嚟香港，準備周五展開嘅香港站大獎賽。賽前連贏比利時同塞爾維亞嘅中國女排，噚日對住過去八年18次交手都輸晒嘅巴西，憑出色發球同攔網，直落贏25:23、25:16、25:20，澳門站全勝捧盃，塞爾維亞得第二，巴西得季軍，比利時包尾。噚晚坐夜船抵港嘅中國女排，香港站對手包括有德國、荷蘭同美國。