問責局長嘅表現，外界一向有唔少批評，商經局局長蘇錦樑當然冇倖免，Greg蘇於港台節目《早辰．早晨》「講式早餐」環節時講到，未必要太認真看待呢啲言論，舉例話喺立法會被抨擊時，要分清到底自己做得唔好，定係喺呢個崗位而受批評，相反人哋讚賞時，就要知道自己做得好定係本身制度已經好，總之唔使太認真，做錯咗要識自嘲。
佢笑稱冇「死忍」，反而諗計釋放壓力，例如朝早起身睇新聞前會先睇聖經。Greg蘇同主持人嘆滴漏咖啡，大讚「原汁原味」，點知主持話：「講到『滴』同『漏』呢兩個字，我哋港台就怕喇！」Greg蘇笑而不語。咁又係，港台電視大廈同廣播大廈早前漏水噃，崩口人忌崩口碗。