對於毛記電視女主播盤菜瑩子嚟講，6月係一個特別嘅月份，除咗係佢嘅生日之外，仲係入行一周年紀念日，今年佢收到一份好好嘅禮物，就係一份健康飲品代言人廣告合約喇！日前盤菜瑩子喺清水灣拍廣告，廣告商仲幫佢準備生日蛋糕慶祝㖭！盤菜好感動咁話：「冇諗過，好意外同驚喜，搞到我有啲感動，如果我冇加入《毛記》電視、《100毛》，我諗一世都冇機會坐低做訪問，可能只係喺電腦mon睇人哋嘅訪問。」盤菜覺得有種重返幼稚園嘅感覺：「有啲驚，雖然有人話外邊世界唔簡單，但我覺得好幸運，大家都對我好溫柔。」人紅是非多，即刻出現拍拖、整容等報道，佢話：「做20年人都冇咁精采過，平時做乜都唔會有人在意，𠵱家舉手投足都會有人講。」
被勸唔好亂講
有傳公司會開拍電影，盤菜話只會信少少，如果有機會亦想嘗試。至於腦細林日曦對佢有乜嘢評語？佢話：「佢叫我努力，唔好亂講嘢，我做主播講時事，有時可能會跟車太貼，網上留言會有爭論。當然我會三思而後行，呢樣大家都需要學，學說話技巧同點睇呢個世界。好珍惜𠵱家嘅言論自由，貫徹宗旨、誓不低頭，光環會掉下來。做《毛記》主播，用我哋嘅手法去報道社會事。」
撰文：馮仁昭