提起恒生（011），大家都會想到呢間銀行先後有兩位一姐，即係前行政總裁梁高美懿，同現任行政總裁李慧敏，相對而言，呢間公司真係有唔少女將，𠵱家掌管投資產品部嘅投資產品及顧問業務主管李佩珊（Rosita）亦係其中之一。
管得投資產品部，應該都要被人捽數，Rosita嘅減壓方法，唔係濕平或按摩，而係寫書法。Rosita認為寫書法幫到自己靜落嚟，佢練習書法多年，擅長隸書楷書。
當執行董事馮孝忠計劃喺「特選客戶交易中心」設「茶角落」，就諗到搵Rosita寫幅「茶掛」（書法字畫）配合品茗。
馮孝忠對茶道好有心得，指除咗茶盤、茶具，中國與日本茶藝中，通常有「茶掛」配合，畀人一邊飲茶，一邊睇字，討論人生哲學。不過，佢哋講投資就係傾俗事，Rosita所寫嘅「君子愛財取之有道」出自《論語》，切合番投資客戶嘅感覺。