葡萄牙冇波入，球迷撐到香港時間周日朝早就有大把入球睇喇，兩場美洲盃八強加埋入成12球；阿根廷以4:1大勝委內瑞拉，美斯有份入一球之後，已經追上名宿巴迪斯圖達嘅54球國家隊入球紀錄。
C朗失威，佢嘅死敵美斯就喺地球另一面威威。對住委內瑞拉，阿根廷喺上半場已經有希古恩梅開二度，60分鐘美斯近門射入，為國家隊入第54球，亦追平「巴迪goal」嘅紀錄；之後雙方各入一球，阿根廷大勝4:1殺入四強，會同東道主美國爭入決賽。睇怕美斯都會喺今屆賽事超越前輩成為阿根廷入球王喇，不過相信佢最大嘅目標，始終係首次帶領阿根廷成年隊贏錦標。
智利派七蛋晉級
接住上演最後一場八強仲多波入，衞冕嘅智利以7:0屠殺墨西哥，入四強對哥倫比亞。前鋒伊度亞度華加斯喺呢場波「大四喜」後，喺賽事累積六球，暫列射手榜榜首。
