噚日父親節，股評界兩位30零歲嘅年輕爸爸：招銀國際策略師蘇沛豐（Daniel）與富昌金融研究部總監譚朗蔚（Stevan）都有特別慶祝活動喎。
Daniel怕去飲茶人逼人，一向唔會喺父親節先同阿爸慶祝，加上太太噚日要返工，佢要同未夠半歲嘅寶貝女過「二人世界」，即係全日湊女囉。Daniel笑言，呢項任務唔容易，事關囡囡朝早係天使，一到黃昏就會扭計變魔鬼，諗起都煩。不過睇番佢哋sweet到漏嘅生活照，幾煩都值得嘅。
Stevan囝囝Kayton就快3歲，揀噚日提早舉行生日會，父親節反而係囝囝大豐收。Stevan話，Kayton返緊學前班，所以第一次收到佢喺學校做嘅父親節卡，已經心滿意足。所以話呢，開心真係有錢都買唔到嘅。