難得里奧有欖球項目，可惜一直努力爭取入場券嘅香港男子七欖隊就冇份，事關佢哋噚日喺摩納哥舉行嘅里奧次輪外圍賽八強，面對實力強橫嘅薩摩亞，雖然有華將姚錦成達陣，但都於事無補，最後港隊以12:31落敗，由於只有冠軍先去到里奧，所以七欖隊正式宣佈緣盡里奧。至於今個星期就輪到港女欖爭里奧最後一個席位，佢哋喺都柏林被編到同阿根廷、哈薩克同庫克群島一組，要出線兼贏冠軍攞到里奧入場券真係唔易。