E貓謝球迷
甲骨文球場被視為「魔鬼主場」，球迷當然係頭號功臣！浪花兄弟之一K湯遜（圖）仲親自寫咗封email，寄畀所有持勇士季票嘅球迷：「球迷係我哋喺賽季中最關心嘅第六人，希望你哋喺呢場生死戰可以早啲到場為勇士打氣；我亦希望球隊可以喺主場封王，同你哋一齊慶祝！」
潮T講拜拜
NBA總決賽開打至今，兩隊球員、球迷甚至球員家眷都不斷喺網上罵戰。最近就有騎士球迷整咗件印上Bye Ayesha嘅衫（圖），似乎唔想再見到「咖喱嫂」，件衫都要賣12.99美元（約100港元）㗎。據講呢句口號係扮近年喺twitter好常用嘅Bye Felicia，向啲無關痛癢嘅人講再見。
護夫夠幽默
占士喺總決賽Game 5話俾祖蒙特格連啲trash talk辣㷫，搞到唔少人笑佢心靈脆弱，勇士嘅史比基斯仲喺社交網站上載奶樽emoji，笑佢係個淨識喊嘅bb。老公俾人笑，「大帝嫂」Savannah梗係唔忿氣！但佢冇學咖喱嫂咁同人鬧交，而係着咗件印上「not your baby」嘅衫（圖）幽默還擊。
母校睇波團
克里夫蘭全城撐騎士！總決賽生死戰就快開波，占士嘅母校聖文森聖瑪麗高中亦決定喺一座以占士命名、可容納1,800人嘅體育館（圖）舉辦睇波團，成人要畀五美元入場費，該校學生同13歲以下人士就免費。騎士亦準備喺主場速貸中心外舉辦睇波活動，預計會有二萬人參加。
