民主黨嘅新東戰將林卓廷，因為成功反圍標而魅力驚人，連「綺夢」都被吸引？話說名為「張敏」（唔好問「綺夢」點解係「張敏」呀，八方唔係好老㗎咋！）嘅市民，盜用阿廷嘅相作facebook賬戶頭像，喺一啲facebook群組留言話阿廷「打倒昨天的我」，質疑阿廷作為翠湖花園業主，有夾錢維修卻反對工程兼組織反圍標大聯盟，咁啱此時又有類似嘅抹黑單張喺區內四圍派，似乎係有組織嘅搞人行為喎。
八方問阿廷對「綺夢」搞佢有乜感覺？佢笑笑口話因為幫小市民反圍標而「艷福無邊」，相信精明嘅讀者一睇就知呢啲留言有乜目的，強調交維修費係因為免除釘契風險，但畀咗唔等於支持同唔可以跟進，啲質疑根本唔合邏輯，「不過都多謝佢哋成日幫我宣傳！」