跑完頭三場，停賽復出的雷神已揸住兩冠一季在手，佢一心於第四場以大熱門「喜悅繽紛」再下一城，點知人算不如天算，被羅理雅粉碎美夢，此場雷神只屈居亞軍。
第四場四班1600米，澳洲騎師羅理雅以文家良馬房「小奇妙」，居中後上擊敗「喜悅繽紛」，爆出12倍冷Win，組合獨贏A2派24.5元，「小奇妙」乃立法會議員林大輝的團體馬，這天73歲甘草演員白茵，跟其丈夫黃文偉一起為林大輝打氣及拉頭馬。「小奇妙」連續第四次跑田草1600米終於開齋，而文家良一連三次賽事贏馬。
雷神今場騎「喜悅繽紛」功敗垂成做二奶，呢匹三歲自購新馬出道三戰，名次順序6、4、2，可以話係與時並進，開齋睇嚟只是時間問題。同場三、四名順序由大冷門「津津樂道」及熱門之一「駟寶」瓜分，李嘉欣愛駒「駟寶」大半條直路困塞冇位出，鞍上人韋達今場發揮認真麻麻，四重彩派超過20萬元。