今屆立法會選舉有唔少ABC反梁大軍，其中最注目嘅當然係新界東嘅自由黨團隊。人氣王田北俊考慮排第二，希望同排第一嘅李梓敬一齊殺入立法會，冀議會內多一啲開明嘅建制聲音。
據知自由黨新東孖寶排陣消息傳出後，田少已經開始帶住李梓敬落區，希望更多街坊支持佢哋拍住上。前日父親節前夕，田少亦出動，同李梓敬喺大埔、沙田、大圍等地區企足5粒鐘，極多粉絲同田少合照，唔少人大讚田少敢言，叫佢繼續狙擊689。
有啲人關心李梓敬若然入到立法會，喺關鍵時刻會唔會退縮？李梓敬就拍心口保證一定唔會。佢話前日同田少落區大開眼界，反應出乎意料地熱烈，為佢哋打咗支強心針。