對於香港「美人魚」歐鎧淳嚟講，噚日父親節即係「負心節」？其實佢講笑咋，屬家中獨女嘅佢，除咗同爹哋歐子明亦父亦友外，仲希望八月里奧可以破到兩項港績送畀爹哋媽咪。
歐鎧淳噚日同一班港將喺九龍公園泳池參加香港D1游泳錦標賽，贏咗200米背泳嘅美人魚講笑話：「父親節即係負心節囉，買咩禮物唔講得，要保密。」其實24歲嘅佢一早訂咗泰國餐廳同父母慶祝：「如果冇爹哋，我都唔知變成點，佢係我嘅EQ導師，教我好多嘢，喺人生路上如果冇佢提點，我都唔知點好算。」廿四孝嘅歐爸同歐媽噚日都有到場撐愛女比賽。
講番里奧，今次歐鎧淳歷史性入到接力賽，目標除咗打破港績外，自己負責第一棒嘅100米背泳，都想挑戰港績，一箭雙鵰就最完美：「奧運嘅大賽氣氛加香港歷史性第一次，我哋每個都好畀心機去游，破紀錄機會好大。」
下月二號A標最後機會
噚日200米背泳游出2分12秒09奪冠，但歐鎧淳就唔係好滿意，距離上月東京泳賽造出2分10秒88港績有距離。下月二號最後一場里奧達標賽，美人魚會喺100米同200米背挑戰里奧A標。
除咗歐鎧淳同爸爸食泰菜慶祝父親節，其他運動員噚日各自各精采，香港桌球一哥傅家俊喺fb上載貼滿兩個囡囡相嘅電話套做父親節禮物；仁川亞運保齡球團體賽銅牌功臣楊偉基，結婚兩年最終喺上星期三榮升做爸爸，父親節就留喺家中同初生囡囡及太太度過，好溫馨呀。
