如果足球比賽係計埋點數分勝負，葡萄牙真係好有機會贏今屆歐國盃冠軍。上周六歐國盃F組次輪賽事，佢哋繼續狂攻猛打，但依然贏唔到波，以0:0賽和奧地利。基斯坦奴朗拿度（C朗）又射極唔入，連12碼都「宴客」。經過兩輪分組賽，葡萄牙加埋有成50次攻門係24隊之冠，但𠵱家兩戰得兩分，周三煞科戰對住匈牙利有乜差池，隨時出局。
上陣紀錄超越費高
葡萄牙喺F組首戰對住新丁冰島，全場27次射門入得一球，結果被逼和1:1；到上周六對奧地利，亦係C朗第128次代表國家隊上陣，超越名宿費高，獨佔最多上陣次數紀錄，佢囝囝都有嚟到打氣。不過，踏入新里程並冇為C朗沖喜，10次攻門都入唔到波。喺78分鐘葡萄牙獲得12碼，佢主射中柱彈出，成為今屆歐國盃第一個「宴客」嘅劊子手；完場前喺門前接應罰球頭槌頂入，但越位在先，都係開唔到齋。
首戰和咗冰島後，C朗發晒脾氣，今次似乎沉得住氣，有球迷突破防線衝入球場同佢selfie，佢都叫停保安，畀球迷影埋先走。C朗賽後就將失分責任攬上身：「我好失望，但我哋要繼續奮戰。射失12碼係我嘅過失，不過球場上經常會發生呢啲嘢，我深信下場波會表現得更好，成功晉級。」
單計頭兩輪賽事，C朗每場都有10次攻門，第二位嘅射手就只係平均4.5次；而佢喺歷屆歐國盃決賽周仲累積咗96次射門，遠遠拋離第二位、52次嘅法國名將亨利。
匈牙利靠「烏龍」和冰島
至於上周六較早時間上演嘅另一場F組賽事，匈牙利對冰島靠對手喺完場前擺烏龍，1:1和局收場；前者有四分喺手，晉級形勢大好。周三煞科戰，葡萄牙對住匈牙利如果輸波，就要執包袱走人，贏波就肯定出線；不過到時如果C朗繼續射到腳軟都入唔到波，葡萄牙要闖16強確係唔樂觀。
