喺上周五美洲盃八強，雖然哥倫比亞90分鐘都咬唔入秘魯，踢成0:0，但靠門將奧斯賓拿窩利抽射式嘅撲救，哥倫比亞喺互射12碼贏4:2晉級四強，會對智利或墨西哥嘅勝方。
呢場哥倫比亞攻門較多，但硬係攻唔入，最有威脅嗰球係占士洛迪古斯（J-Rod）喺22分鐘有球中柱。喺補時階段，久攻不下嘅哥倫比亞差啲輸埋。秘魯後衞基斯甸拉莫斯頭槌攻門，好在奧斯賓拿冇瞌眼瞓，撲出底線。兩隊法定時間互無紀錄，直接射12碼決勝。去到第三輪，奧斯賓拿做英雄，秘魯嘅米基爾查奧高射中間，雖然奧斯賓拿撲咗去左邊，但佢用腳凌空踢走個波。秘魯打窒咗道氣，第四輪嘅基斯甸古華炒高，哥軍贏4:2晉級。賽後開心到喊嘅J-Rod話：「奧斯賓拿真係好勁，我希望佢繼續勁，我好愛佢！」