蘇偉賢馬房之「帝聖名駒」列陣周日(19日)第1場四班1000米直路賽，這天作最後操練，居然出動到柏寶親試，在內圈快踱一圈，亦係近11日之內，柏寶第九度親試，當中包括大圈快跳及試草地，有幾重視真係毋須多講。若非「帝聖名駒」有上佳潛質，柏寶又怎會咬實此駒唔放？
3歲澳洲自購新馬「帝聖名駒」今仗在港初出，隻馬已經做咗好幾個月備戰工夫，試過三次大閘，睇個格局一早決心一出即拼。查血統「帝聖名駒」為其母的第十二胎，之前有八胎贏馬，成功率高，大部份同母馬跑短途能夠多捷，包括在1600米或以下八捷贏三級賽阿德萊德堅尼的BLAHNIK，而父系子嗣亦普遍早熟有質素，好似「嘉福」在港6戰得2冠3亞，初出就贏1000米直路賽，「帝聖名駒」隨時可照辦煮碗。