有「十優港姐」之稱的麥明詩近日在深圳拍攝無綫新劇《賭城群英會》之際，其男友林作被揭偕女夜蒲兼向女伴「抄牌」，因而激嬲女友。據《賭》劇工作人員透露，麥明詩悶悶不樂時，「鴨王」何浩文（Dominic）就乘虛而入，對麥明詩大獻殷勤，不時黐住女方一起吃飯，似乎要跟大律師林作拗手瓜。
近日Dominic於Instagram頻頻貼麥明詩相片，明冧女方。Dominic雖然去年被爆有空姐新歡Candy，但二人聚少離多，據悉已分手收場，又難怪Dominic可以瞓身力追麥明詩。
認有好感
記者昨日問Dominic是否追求麥明詩，他透過微信回覆說：「唔係啦，有男朋友我麻麻哋！」雖然他否認有追求之意，但就承認對麥明詩有好感：「見同佢幾啱傾，又唔離地，拍劇成日對住感情幾好咁樣囉！」林作可算是對手？Dominic風騷大講爛gag說：「冇乜人係我對手喎，因為『對手』我自己得一對，正所謂我有一對『無法可修飾的一對手』。」
另外，林作日前接受周刊訪問時，透露麥明詩仍未肯接受他解釋，自己本想北上探女友當面為「抄牌」事件解畫，但女友卻不想他出現而影響拍攝情緒。對於Dominic追求麥明詩，林作就透過WhatsApp回應：「麥明詩咁靚，如果沒有緋聞，係對佢的侮辱。再者，我十分歡迎挑機的。不過最近我自身難保，確實比較沒自信，加上律師工作繁忙，確實無暇顧及。幸好，我們有你哋幫手監視。」
採訪：陳杰、魯吉
