做人父母，教育子女如終生學習，不同年代的爸爸也有自己的一套。已過花甲爺爺之齡、多情的林建名是傳統型爸爸，將家訓的省儉、誠實、誠信傳給四個子女，更稱恨抱男孫。學習做爸爸階段中的鄭中基，因為子女戒除夜夜笙歌生活，成為住家男人。而緊守教義的高皓正做爸爸上癮，自言兩個未夠數，教子女以自由出發，希望他們跌碰中成長。
麗新集團已故創辦人林百欣長子林建名（大少），他的四子女中煒珊、煒珽與孝信，先後加入父親的事業王國，大少多年來身兼母職，獨創林家教仔法。外表嚴肅的大少在子女心目中是位嚴父，自小在雞毛掃鞭策下長大，趁着父親節他們跟父親盡訴心中情，過程儼如開家庭會議。而多情亦無損大少的好爸爸形象，他們均謂一切以父親開心為先。
要有適量體罰
79歲的大少有過兩段婚姻，與第二任妻子林佩嫦誕下煒珊與煒琦兩女，再與女友育有瑋珽與孻子孝信， 四子女非常孝順，對於父親的評價，大女煒珊說：「我得一個老竇，冇得揀，梗係100分啦！」煒珊憶起父親在她17歲那年，於美國駕駛兩個多小時到寄宿學校，為的是送上滿車的食物，煒珊說：「佢知道我食唔慣寄宿學校嘅嘢，就特登喺超市買咗好多嘢食，仲要揸兩個幾鐘頭車送過嚟，真係好難忘好感動。」
大少工作後回家的時間全部獻給子女，瑣事如買衣服、飲食他都照顧到，而子女都孝順能幹，教孩子他堅持要有適量體罰，大少說：「我認為打細路係應該嘅，打到佢痛，等佢知錯，𠵱家成日話唔打得，真係冇乜理由，佢哋四個都打過，讀書唔得唔會打，但做嘢唔啱，講完唔聽就要打。」說到林家的家訓，大少說：「省儉，做嘢誠實、有誠信，唔可以有害人嘅心，要對得住天地良心。」
大少直言希望明年80大壽後計劃退休，他說：「佢哋都幫得手，我都應該退休畀佢哋做。退休想坐船呀，去南美、中美、北極，所以快啲畀我退休。」大少更望28歲的孝信早日成家立室，恨抱男孫，為林家傳宗接代。
細女煒珽是大少的寶貝，憶起小時候每晚都要跟大少同睡，煒珽說：「爹哋陪我瞓到11歲前，佢好忙，但成日都喺我哋身邊，我哋每星期都會食飯，然後一齊行街。」煒珽亦覺得父親的心思令她感動，她說：「佢每次旅行都會買嘢畀我，代表佢會諗起我。」孝信不喜歡講話，簡單一個「Chill」字來形容父親，他指從父親身上學到做人要有責任心。
「想有人照顧我」
多情二字似乎已成為大少的標誌，對於父親經常被指多情，他們卻不太在乎，煒珊說：「佢開心就得啦！」煒珽亦表示：「冇所謂。」大少聽罷似乎有所反應，反問女兒：「係咪希望有個女朋友跟住？𠵱家成日都冇得跟，真係想有個人照顧我，𠵱家好多嘢做，做得好辛苦。」煒珽說：「唔使女朋友，𠵱家好多人跟住你，唔需要啦。」煒珊亦說：「請多幾個工人陪你。」一家之主想找個真正的女朋友，似乎先要過囡囡們一關呢！
撰文：羅慧敏