估唔到，真係估唔到，形勢大好的勇士隊竟然會由領先場數3比1之下，被大帝的騎士追平至3比3，Game 6咖喱仔更是六犯離場，雖然都有30分進賬，但命中率50%都冇，對佢嚟講已經係失晒準，唔知同佢着的戰鞋又有冇關係呢？雖然Under Armour已經為咖喱仔造出Curry 2.5，但睇波時就發現佢只是賽前試着下，到比賽時又着番今季着開的Curry 2。講到Curry 2.5，這對新戰鞋會在6月18日正式在港推出，記者就在推出前細看並試着過新鞋，雖然只是2.5而非3，看似是升級版，但就發現無論外形，還是舒適度都比Curry 2改變和高了不少。
先說鞋面，由上代頗不透氣的膠料，改為今次由尼龍結合橫紋膠料製作，大大提升透氣度之餘，亦一改Curry 2因鞋面較硬而令腳指摺位在活動時的微小不適情況，卻同時保留了良好的強度和支撐性。另外，新鞋最特別之處就是，以一體化半開放式的鞋舌，取代上代的傳統式設計，記者雖未有着來打波實試，但稍稍試穿也感覺到新鞋的包腳感相當好，非常緊貼腳面，加上鞋舌頗厚身，減少腳面受壓，非常舒適。
鞋底方面則沒有任何變動，源用了Curry 2的Charged中底和外底設計，有着過Curry 2的波友應該都會讚同其中底在緩震和力量回饋方面平衡度頗適中，具不錯的舒適度。不過可能就是因為鞋面未有從新設計的緣故，這新鞋只能掛上2.5牌頭，而非正式的Curry 3。在個人特色上新鞋就比上代稍弱，「SC」字樣繼續低調之餘，「I CAN DO ALL THINGS」比上代更不顯眼，只隱藏於內側膠橫紋中，唔講唔覺，反而Under Armour標誌就比上代更大更誇張。值得一提的是Curry 2.5的後踭位減少及Curry 2上稍高的加固設計，或會令新鞋對後踭支撐及穩定性有影響（或者這就是Curry無着新鞋打Final的原因？）。
新鞋暫時公佈了兩色，一是勇士隊的藍黃，但個人覺得一般，反而另一款深藍配紅就相當吸引。總括而言Curry 2.5外形或許未如Curry 2，但舒適度和實戰力就比Curry 2優勝，或許咖喱仔在終極一戰應換換鞋，轉轉運，打爆大帝「占屎」，贏多次總冠軍！（利申：記者唔係Curry粉絲，只係好憎「占屎」！）
查詢：中環擺花街38號Under Armour
記者：韓繼聰