費清過去幾like 759阿信屋，林老闆嘅「689」折扣優惠（正價貨品6折、公價貨8折及超抵價9折），幫到費清之流慳唔少，點知4月突然取消「689」，費清感覺信錯咗人，都冇去759。好在林老闆知錯能改，連續三日「689」折回歸，仲揀啱今日父親節喺最後一天。
689強勢回歸，林老闆隻手噚日甩咗骹，都要返公司座鎮。佢話睇番啲生意額，力證自己4月決定，係完全係錯既。林老闆話，同端午節7折比較，以票單據量計，「689」折一日發票達到68萬張，每張貨品數量4.8件，端午節一日只有59萬張，每張貨品數量4.6件，「回復689折，啲客即刻返晒嚟」。
林老闆又話，四大最好賣嘅貨品，賣得好癲，排第一位嘅濕紙巾，一日就賣咗2.3萬包，係咪癲咗？第二位洗衣波波賣咗1.4萬包，預咗兩個貨櫃都賣斷貨，排第三位8公斤裝泰國米，被人掃咗2,608包，第四位出前一丁，賣咗2,200包，「真係好誇張」。
佢話，另一波減價就係下個月六周年紀念，但都家都未諗掂優惠係「689」，定係「777」，最快會喺今個月底公佈。
費清＃要生計，也要生活＃毋忘初衷