【本報訊】 「第一次（飛）已經覺得今生無憾！我想飛高啲、飛遠啲！」68歲的城叔大半生為持家勞碌，盡丈夫及爸爸的責任，一直將藏在心底20年的「滑翔夢」擱置。今年初患癌的妻子離世，他豁出去學玩滑翔傘，成為全港最年長學員，4月在台灣首飛成功。子女挺身支持爸爸，幫他背逾20磅的裝備上山，讓這位活力爸爸輕鬆再次高飛。
記者：張珮琪 攝影：麥超億、周子惇、張鼎和
「喺上面飄吓飄吓，鍾意轉邊就轉邊，都唔知幾自由自在！」城叔降落後仍回味在空中的快感。不過每飛一次，必先勞其筋骨。大熱天時，他要背着重逾20磅的裝備和食水登山，未飛已大汗叠細汗，然後要檢查裝備，觀察風勢轉向，時機一到就要用力控傘，轉身助跑加速飛躍上天，動作稍慢隨時失手跌落山坡。上上落落，說不定虛耗一整天也未能享受飛行樂趣。
難得兒子Billy（34歲）一有空閒就陪爸爸：「我放假都想陪吓佢，始終個傘重，佢咁孭法唔知行幾耐，費事佢飛嗰時太攰，幫佢孭下囉！」城叔雖然默不作聲，但甜在心頭低聲向記者說：「個仔成日話陪我嚟幫我孭傘，但係禮拜日我想佢瞓晏啲，休息多啲！」可謂父慈子孝。
兒子負責孭傘，女兒也陪伴在側，準備糧水，照顧周到。「𠵱家仔女大喇，趁我仲有體力，鍾意做乜就去做！」城叔20多年前與太太行經石澳，見有外籍人士玩滑翔傘已深被吸引，但當年子女仍未出身，被太太阻止。
拼搏半生，子女長大學有所成，城叔早4年前已想過圓夢，但不幸太太患上癌症，他遂全心全意照顧太太。至去年底，相伴40載的枕邊人走到人生最後一段路，城叔更認為「做人想做就要做」，與女兒合力游說，太太終答允讓他學滑翔傘。
玩滑翔傘視乎天氣，城叔學習了短短半年，由學習地面操控，到4月在台灣首次成功飛上天，他笑說：「飛咗一次後，更加鍾意！」Billy上班未能同行的日子，總記掛爸爸的安全：「我見到個天突然風雲變色，唔知佢點樣，又唔敢打畀佢，好彩佢打電話返嚟話飛到，佢好犀利。」不過，回程途中城叔扭傷腳，幸兒子是中醫師，晚上回家立即幫他捽藥酒。
雖然玩滑翔傘難免有損傷，但子女仍撐父親，女兒希望今年入秋學習滑翔傘，與爸爸互相照應。城叔笑說：「我好期待同個女一齊飛，一齊喺上面兜嚟兜去，嗰啲感覺我諗係特別唔同啲。」
《蘋果》以特別拍攝手法，帶大家360°一起與城叔翱翔。請按以下連結收看： https://youtu.be/ohYDT_jwNjU
360°體驗方法：
按入連結，進入YouTube app，即可以360°全景體驗。你更可以手指按住螢幕，拉去不同角度。
如未能成功看到《蘋果360》觀景畫面，讀者可先更新YouTube應用程式：
iOS： http://apple.co/1IMQT8r
Android： http://bit.ly/1Kt8Z6V
如iOS用戶安裝YouTube App後仍未能收看，可在進入YouTube介面後，按右上角的「箭嘴」接鈕，再按「Open in Safari」，即可成功收看。