【拆局】
銅鑼灣書店店長林榮基大爆遭大陸拘禁內幕，令本已平息的銅鑼灣書店事件再受香港及國際關注。有知情人士稱，北京拘禁銅鑼灣書店股東及員工本想追查涉軍方洩密事件，「點知搞出個大頭佛，變成搞到香港一國兩制」，據知北京仍未想到拆彈方法，只好又用抹黑戰，更有傳對林抹黑會升級，「但香港人仲點會信（抹黑）」。
查軍方洩密 搞出大頭佛
該知情人士綜合消息稱，北京拘禁書店5子，原本是因一本與桂民海有關、涉國家主席習近平軍改的書披露了中央機密軍改資料，「所以北京由銅鑼灣書店入手，想捉嗰個畀料人，其實真正目的係中共內部權鬥」，但因處理手法拙劣，事件變成國際大事，打擊各國對一國兩制信心，「原本北京以為放咗李波件事可以平息，點知林榮基又爆大鑊，搞到北京唔知點收科」。
有政界中人稱，有內地人士向他了解有何方法為事件拆彈，「但佢哋知道今次畀李波事件仲難拆，因為林榮基已豁出去，威逼佢唔怕、利誘更加冇可能」，事件亦廣為外國傳媒報道，該政界中人聽聞，大陸只有對林再打抹黑戰，「有消息話嚟緊會對林榮基鋪天蓋地抹黑，包括用人格謀殺手段，就算唔可以令市民、外國傳媒唔信佢，起碼令人質疑佢有政治目的」，但該政界人士認為港人未必相信。
■記者莫劍弦