最近睇完NBA決賽，就上NBA、ESPN網讀一啲賽後評論。金州勇士贏決賽，擊敗克里夫蘭騎士，係大熱門預測，因為NBA決賽史上，從無一隊落後一比三而可以反盤，贏得冠軍嘅。騎士唔係唔好，但弊在太集中三名主將占士、艾榮與勒夫，特別係前兩名主將。喂，占士雖有資格做球王，但已經30歲，場場要佢拚命打40分鐘以上，難得有時間坐低唞唞氣，幾難頂啦，是故占士經常去到第四節最後三分鐘，就跳唔起，剷籃無力，遠投手軟（時常射籃撞框就係手力差啲啲嘅表現），點可以為騎士起死回生或者頂住勇士隊反攻吖。但第五場比賽，騎士隊背水一戰，絕處逢生，就足以證明占士與艾榮有資格做籃球超人，兩者合共轟入82分，扳回一仗，令人目瞪口呆。之但係咁，左丁山仍然認為勇士可以最後勝利。
睇ESPN網站，無可避免一定聽到睇到中文廣告，肥仔K話大數據非常厲害，網站會自動認識香港電腦嘅IP地址，知道用戶住在中文語言區，於是全部彈出中文廣告（例如私人貸款），我地想避都避唔到，不勝其煩。最近日日見到嘅廣告就係Airbnb，宣傳民宿（日本叫民泊），一於針對性地與酒店爭生意。睇廣告多次，有冇人用過呢？原來老友曾智華一家四口去日本，就上Airbnb租用民泊，住得好滿意，價錢又相宜，阿Luke見到老友就大讚。左丁山於是話俾另一位朋友Y知，朋友Y一家三口又係去日本，Airbnb啱用嘞，點知Y太太亦周圍打探，得到嘅意見係勸佢咪搞，住番三星酒店好過。原來太太群組曾在WhatsApp討論，T太話用Airbnb租咗間屋，幾乾淨，好滿意，晚上遊覽盡興而歸，丈夫與兒子在露台講波飲啤酒，T太要將是日衣服清洗兼怕弄污糟人地間屋，就用吸塵機吸塵，於是洗衣機吸塵機一齊開動。唔駛十分鐘就有鄰居拍門，投訴佢地太嘈，擾人清夢，日本人家庭在晚上係要保持靜寂，唔好大聲講嘢嘅，開吸塵機及洗衣機係大忌。哦，呢啲嘢留番幾時做呀，梗係次日早上啦，但早上天氣好，係出外遊覽黃金時間，點會洗衣服呀，為屋主吸塵呀，清洗呀，於是T太覺得好竧，話過以後唔住民泊；Y太得知，立即警告Y先生唔好再上Airbnb嘥時間，正是一處鄉村一處例，大家出外旅行，尤其是往日本，租民宿事先要查清楚。