曾俊華之前以署理特首身份主持行會，好風騷同記者傾偈，噚日佢又以呢個身份，出席香港公共行政學會午餐會，又用英文演講，今次佢同樣係表現得好輕鬆，話學會同佢講，可以揀任何認為合適嘅題目發言，所以鬍鬚曾特登向在場傳媒預告，話唔好預今日會有「驚喜（surprise）」發言，又笑住同在場賓客話，佢諗住食完飯先講嘢，仲叫大家可以「叫定咖啡先」！
咁鬍鬚曾發言又係咪冇驚喜？咁又真係喎！又係來來去去講預算案同公共理財手法，話自己過去唔係故意低估政府盈餘，而係香港經濟經常被外圍因素影響，政府開支一直增加得比盈餘快等等。八方聽見鬍鬚曾又講呢啲，果然係一個有信用嘅財政司司長。