西班牙門將迪基亞上周五俾西班牙傳媒揭發喺幾年前做過「馬伕」，幫U21隊友蒙尼恩及艾斯高，同埋曼聯隊友搵女，事後佢喺記者會上否認，仲話已經交晒畀律師處理，教練迪保斯基亦畀佢喺贏捷克1:0嘅D組分組賽上打正選。以為呢單性醜聞暫時告一段落，點知西班牙傳媒日前又爆料，指當日有份為蒙尼恩及艾斯高提供性服務嘅囡囡，喺其中一個球員嘅床頭櫃度見到可卡因。雖然唔知係真定假，但迪基亞肯定仲有排煩囉。