銅鑼灣書店店長林榮基噚日突然搵白鴿黨何俊仁開記招爆大鑊，可謂震撼中港政圈，唔知係咪吸收咗當年保護斯諾登經驗，今次白鴿對林榮基保密工作做得好成功，除咗神不知鬼不覺運佢入立法會，事後更成功避過狗仔隊送佢走，八方聽聞今次行動除咗有仁哥、單雞兩個，原來仲有未曝光嘅「第三人」，就係民主黨嘅涂謹申！
馬會移形換「車」
原來噚日林榮基喺立法會開完記者會後，大批傳媒繼續跟住佢，原本白鴿黨搵咗單仲偕做車手，送林榮基去佢指定親友屋企，但單仲偕見成班傳媒狗仔隊跟住，知道一定走唔到，於是匆忙打番畀民主黨求救。
八方聽聞有人心生一計，叫單雞嗱嗱聲駛架車去馬會山光道會所，送何俊仁同林榮基去「食飯」，其實就安排黨友涂謹申揸另一架車入馬會，偷偷接走林榮基，所以當會所外傳媒見單仲偕架車開走，發現林榮基唔喺車入面時，其實林已一早坐咗阿涂架車走人！
咁查實林榮基有冇喺馬會食飯？知情人士話林叫咗盒海南雞飯外賣拎走，其實由林榮基前日兩點搵仁哥，到送走林嗰7、8個鐘，林榮基同民主黨都好緊張！好似仁哥由中環陪林榮基坐港鐵去立會，就一路睇住有冇人跟蹤，到成功「偷運」林入立會，肯定安全先鬆口氣。
仁哥之後就同林榮基去立會5樓食咗個公仔麵，再帶佢去立法會沖咗個涼，點知林榮基因為唔識用立法會個沖涼掣，結果沖咗個凍水涼！其實仁哥知立會唔畀外人用沖涼設施，但覺得「佢為香港做咁多嘢，畀佢沖個涼啦」，不惜為林榮基違規一次咁話。
李八方
mailto:[email protected]