追數王不久前去一帶一路旅行，趕上潮流也。佢去咗三個國家，吉爾吉斯、烏茲別克、哈薩克，得到嘅印象係地方遼闊，交通不便，當地人對華人友善，香港人甚少去呢啲地方，現在中央與特區政府不斷吹噓一帶一路，於是不同組合嘅旅行團乘時而興，你話好奇也好探險也好，我地去過一路國家（星馬泰印尼柬埔寨越南）無數次，去一帶地區總之有新鮮感。
有冇商機呀？追數王話地區經濟落後，天然資源豐富，又未開發，梗係有商機啦，不過唔會係香港之商界嗰杯茶，而係更適合中石油、中鐵建、中國建築等大國企，爭取機會去當地大搞鐵路、公路、油廠、發電廠，打造基建先，之後才輪到香港廠商去當地試吓開紡織廠、電子廠，最好就係等十年八年之後先至去。
一個大集團主席又去烏茲別克、哈薩克探路噃；喺馬場碰到佢，佢話路程真係幾遙遠，坐飛機接坐汽車行幾小時，成個人散散地，如當地交通未能解決，發展經濟純是空談。或者當地人鍾意保存現有環境狀態，愛護環保呢。一旦中國人資金及基建大軍開入去，草原高山必定沙塵滾滾，環保人士大呼災難臨頭呀。
香港其實對一帶認識甚少，對一路亦只係鍾意去吃喝玩樂及開工廠，極少研究當地語言文化。現在教育局話要成立一個「一帶一路獎學金」，鼓勵一帶一路嘅學生來港，及保送香港學生去一帶一路留學，原則上左丁山認為係好事，可以支持，十億元係一個小數目啫。但實際上，外來學生對香港興趣可能幾大，特別係一路國家，但叫香港啲少爺公主去一路都唔肯啦，遑論一帶，去呢啲地區留學，幾乎肯定無人問津。攞得獎學金，應該係成績優良之輩，但優秀學生只識哈耶牛劍，邊個肯申請一帶一路呀，去烏茲別克讀大學，唔好講玩笑。去泰國都唔制呀，講起嚟，左丁山係第一批先行者，去泰國法政大學讀碩士，每次都俾人質疑係唔係無路行先至去到泰國。左丁山讀完碩士後，影響幾位新亞經濟系師弟都去咗，但到咗80年代中，已無人肯申請十分優厚嘅洛克菲勒獎學金，令法政大學無癮，索性取消咗香港quota，不再來港招生，今天香港人更加有錢咯，眼中只有英美澳加，點會睇得起一帶一路嘅大學？或者咁啦，考DSE得五科三級，中文二級都有資格申請留學一帶一路獎學金，或者可以吸引學生申請！