【本報訊】新地（016）元朗Park Yoho 1B期首日開放示範單位，記者昨到元朗扮客，代理狂sell 120%超凸樓按，並催促記者快聯同家人大量入票。
從西鐵站走入新元朗中心，已看到數十位地產經紀拉客，「係咪想買樓，睇Park Yoho有車搭喎。」記者隨後跟經紀往現樓，經紀開始力銷樓盤：「今次平均一萬左右一呎，即供仲有最多平11%，好抵！」當記者提及按揭問題時，經紀便問記者有否物業，當回答有時，經紀便即拍一拍記者膊頭並表示：「有層樓就掂啦！好易搞得掂，今次發展商仲有好多玩法，可以借足120%按揭。不過如果翻按，出去搵銀行會平過搵新地嘅財仔。」
參觀現樓後，經紀便全力推銷入票：「就算睇啱單位都要入咗票去抽籤先，所以最好入票先啦！」當記者表示不夠首期買三房單位時，經紀便提出可以透過「至高無上King's Key120」借盡樓按。「假設你買個800萬單位，你現有層樓估值唔低過六成，即係480萬，咁你可以借到880萬，甚至960萬，理論上你係1蚊都唔使畀嘅。第一年只係還息，三年後要還晒全數，但還唔到都唔使驚，因為可以申請延長做25年按揭。」
「帶埋屋企人入多幾張票」
這個時候，兩名經紀輪流推銷記者入票：「你按揭嗰度肯定冇問題，咁你入咗票先啦，呢度係A組同B組，如果你帶埋屋企人可以入多幾張票，碌咗卡先，翌日嚟唔使排隊入表。」當記者表示信用卡不夠額碌10萬，經紀便指有方法：「睇吓你張卡碌到幾多，如果碌到8萬，咁我諗吓方法幫你，或者畀個戶口號碼你，你轉頭夜晚入錢畀我，或者用EPS。」
樓盤外圍，亦有數十名代理在烈日當空之下撈車。市傳項目昨日收票超過270張。
【市民意見】
新界西北居民何女士：「近期各行各業都唔掂，絕對不會考慮買樓，Park Yoho借凸按揭計劃同97及03年沙士時賣樓手法差不多，買家要承受高風險。」
