噚日內務委員討論4位泛民議員要求，就銅鑼灣書店店長林榮基事件提出急切質詢，好快就要面對選舉嘅建制派都唔敢阻止，但係點先可以唔得罪阿爺，又唔得失香港人呢？咁就靠內會主席梁君彥喇！
噚日表決支唔支持泛民提急切質詢時，梁君彥照舊叫贊成嘅舉手、反對嘅舉手。
泛民梗係贊成，建制派就乜都唔舉，梁君彥見狀就嗱嗱聲宣佈贊成多過反對，連泛民要求記名表決都唔理，話「做完啦，冇人反對，我宣佈咗支持呀」。
泛民要求記名就梗㗎喇，做人光明正大，既然唔反對點解唔留番個紀錄先！𠵱家有梁君彥幫手，建制派就唔使咁樣衰留下撐泛民嘅紀錄。