隔牆有耳：
贊禮號泊港　有衝浪　碰碰車 - 李八方

去年暑假有隻巨型郵輪「海洋量子號」嚟咗香港，今年輪到佢嘅孖生姊妹「海洋贊禮號」10月底嚟香港啦！今次仲會以香港做母港一個月，即係出發同回程都喺香港，船飛7月初開賣。

海洋贊禮號10月29號至11月30號會泊去啟德郵輪碼頭，係以香港為母港歷來最大嘅郵輪，到時會提供5次船程帶旅客由香港出發去日本同台灣。造價10億嘅贊禮號係量子級別郵輪，排水量16.8萬噸，最多可載4,180人。郵輪噚日到達，八方有幸上郵輪打個白鴿轉，內櫳其實同量子號大同小異，只係多咗國寶級熊貓藝術裝置、仲有同北京故宮博物館合作，為郵輪擺咗上萬件藝術珍藏。

上到船大家最緊張當然係有乜玩，其實就同量子號一樣嘅，去到甲板大人可以去衝人工浪，細路可以去水上樂園，再刺激啲仲有模擬跳傘。太激唔啱玩又可以坐吊臂式觀景台North Star。怕曬嘅入到室內一樣有碰碰車、打機、打波等緊你。不過八方都係最鍾意Bionic Bar，有隻高科技機械臂幫你調酒，個杯shake幾多吓、去到邊個步驟、要等幾耐，望吓個mon就知，chill得嚟又幾趣致。